Registers van de Hollandse grafelijkheid 1299-1345

Graaf Willem III verkoopt zijn knaap Mathijs Rengersz. alle goederen te Dirksland die hem waren aangekomen na de dood van heer Costijn van Renesse, welk goed Mathijs en diens wettige erfgenamen van hem zullen houden.

Wi Willaem^b grave^c van Heynnegouwen^d, van Holland^e, van Zeland ende here van Vriesland^f maken cond allen luden dat wi Mathijs Renghers sone, onsen trouwen knape, vercoft hebben om eene somme van ghelde, dair hi ons ghenoch of ghedaen heeft, al dat goed dat ons ane bestorven es van heren Costijns doit van Renisse^g, dair God die ziele of hebben moete, ende gheleghen es in Diederix lande, in deser manieren: ware dat sake dat hi ghienen sone en hadde van wittigher gheboirte, dattet voirseyde goed na siere doit up siere ouster dochter comen sal, ende voirt van ons ende van onsen nacomelinghen hem ende sinen nacomelinghen te houden na den rechte van onsen lande van Zeland^h; ende gheloven hem dit goed voirscreven also alst gheleghen es te waren jeghens elken man, als wi sculdich sien te doene na zede ende costume van onsen lande.

In orconde desen brieve beseghelt mid onsen zeghelⁱ. Ghegheven tote Valenchijn^j des sonnendaghes na sinte Pieters ende sinte Pouwels dach int jair ons Heren M° CCC° vier ende dortich.