Registers van de Hollandse grafelijkheid 1299-1345

Jan III bisschop van Utrecht, Jacob bisschop van Zuden, Nicolaas abt van Middelburg en twintig met name genoemde ridders verklaren dat zij, na het horen van de schepenen van Dordrecht enerzijds en van die van Delft, Leiden, Haarlem, Alkmaar, Gouda, Schoonhoven, Akersloot, Uitgeest en Wormer anderzijds betreffende de handhaving van het Dordtse stapelrecht, waarbij ook de handvesten terzake zijn getoond, na overleg met de aanwezige grafelijke leenmannen aan graaf Willem III adviseren dat hij in deze kwestie de oudere handvesten voorrang geeft boven de jongere.

Vgl. nrs. ZH 218 en 230.

Wi Jan bi der ghenade Goids bisscop van Utrecht, Jacob bi der selver ghenade bisscop van Zuden, Niclays^b bi der ghenade Goids abt van Middelburch, Gheraerd^c here van Vorne^d, burchgrave van Zeelland^e, Guye van Vlaendren here van Putthe, Pieter here van der Lecke, Ghisebrecht here van Yselsteyne^f, Jan van Cruninghe, Hugheman van Zevenberghen^g, Steven van Niewenvelde, Arnt^h van Yselsteyneⁱ, Jan van der Dussen, Daniel van der Merweden^j, Otte van Asperen^k, Willaem^l van Wijfliet, Clays van der Merwede^m, Harparen van Rieden, Costijn van Renesse, Clays van Cats, Clays Kerving van Reymerswaleⁿ, Dieric^o Bokel^p, Jacob van Moerdrecht ende Jacob van Scobben, ridderen, maken kond allen luden dat wi daer over waren daer^q die scepene van der stede^r van Dordrecht^s op die ene side ende die scepene van Holland^t uten steden alse van Delf, Leyden, Haerlem^u, Alkemair^v, Goude^w ende Scoenhoven, Akersloet, Uytgheest ende Wormer^x op die ander side hore hant vesten togheden voir ener edelen moghenden man ..onsen^y lieven here, heren Willame^z grave van Heynnegouwen^a' etc., alse om dien twy die si onderlinghe hadden om den stapel tote Dordrecht^b' te houdene; ende op die handvesten hoerden wi horer beyder woerde ende weder woerde voir den grave voirs. Ende want ons die grave voirs. bat ende vermaende bi der trouwe die wi Gode ende hem sculdich waren dat wi hem rieden dat beste, ende wat hi na horer^c' beyder handvesten ende na harer beyder woerde ende wederwoerde sculdich waer te doene, soe hebben wi ons met goider voirsienichede besproken met allen des graven trouwen^d' mannen vors., ridderen ende knapen ghemeenlike die daer waren, ende met hem over ene ghedraghen dat wi den grave voirs. gheraden hebben na onser wetentheden ende raden dat hi emmer die outste hantvesten houde die roeren van zinen ouders ende van hem, ende houden doe elke alsoe als^e' zi spreket na haren date; ende na der maninghe voirscreven soe houden wi dit voirscreven over recht.

In orkonde desen brieve bezeghelt met onsen zeghelen. Ghegheven in die Haghe des donresdaghes op sinte Lucas avond int jaer ons Heren M^o CCC^o XXV^o.