Registers van de Hollandse grafelijkheid 1299-1345

Pieter heer van der Lek en zijn zoon Hendrik van der Lek verklaren dat zij 2.400 pond zwarten Tournois schuldig zijn aan heer Wouter Bau wisselaar te Mechelen, Jan heer Gillisz., Nicolaas Oom, Hein heer Gerardsz. en Godschalk Heinenz., en beloven dat deze schuld terugbetaald zal worden uit de opbrengst van hun tol te Smithuizen bij Emmerik; op hun verzoek wordt de oorkonde meebezegeld door graaf Willem III, Reinoud zoon van de graaf van Gelre en Dirk graaf van Kleef.

Vgl. de in het register voorafgaande en volgende nrs. ZH 197 en 199.

Wi Pieter here van der Lecke ende Henric^b van der Lecke, zone des heren van der Lecke vors., maken cont ende kennelic alle den ghenen die desen brief zullen zien jof horen lesen^c dat wi scoudich sijn ghesameder hand ende onghesceden eersamen luden heren Wouter Bau wisselaer van Machelen, Janne^d ser^e Gillijs^f sone, Clays Oem, Heyne heren Ghereits^g sone ende Goetscalc^h Heynen sone, hem jof den ghenen die desen brief toghet of haren erfnamen, vier ende twintich hondert pond zuarter Tornoyseⁱ, den ouden groten over zestien penninghe gherekent, die si vor ons betaelt hebben in ghereden ghelde Palmerijn den Lombaert^j van Gorinchem^k ende sinen ghezellen, voer wilke summe van den penninghe vorscreven wi gheloven bi onsen ede ende up onser trouwen desen viven vorghenoemt jof den enen van hem viven of haren bode die desen lettren toghet, ofte wittachtich uytscrift daer of, te zetten in onse tollen te Zmithusen^l die gheleghen es tote Emmerike ofte waer dat mense elwaer leghede, ende dier tollen doen te ghebruken zonder alrehande archeyt, daer in te ghane ende te ghebruken ghehelic ende al in sente Martijns^m daghe in den winterⁿ alsmen scriven zal M CCC zes ende twintich, up onsen cost zonder haer scout yet te minderen, al dat ghelt ende verval van der tollen tontfane tote der tijt toe dat si die XXIIII^C lb. Tornoyse^o vorscreven vol ende al up gheheven hebben, ende allen coste ende scade^p die hem jof haren zekeren bode daer of comen mochte, bi haren simplen woerden te gheloven zonder archeyt ende te goder bewisinghen; ende ute desen tollen voernoemt zoe zal die vrouwe van der Lecke onse stief moder des heren van der Lecke vors. heffen van den ghelde dat van der tollen vallen zal jaerlix C march goder Brabands die haer daer up bewijst sijn, ende anders niet meer en zal uter tollen gaen, uytghenomen der ghere cost die van deser viver weghen vorscreven in legghen zullen, ende des boden cost die wi met hem daer in legghen zullen. Ende wi Pieter here van der Lecke ende Henric^q sijn zone vorscreven verlien ons zelven ende verbinden ^r alsoe bi onser trouwen ende bi onser eeren ende up al onse goit, zoe waert gheleghen es, alle dese poynte vorscreven wittelic ende trouwelic te houden zonder enich wederzegghen; ende om die mere zekerhede hier of zoe bidden^s wi onsen lieven heren, heren Willame^t grave van Heynegouwen^u etc., heren Reynoude zone des graven van Ghelre ende heren Dieric^v grave van Cleve, dat si desen brief met ons ende up ons beseghelen willen, ende hem verbinden ons doen te houden ende onsen erfname des onser ghebrake of wi jof yemand dese stucken verbreken wilden in desen ponten vors. of in enighen van den ponten, ende ons daer toe dwinghen te houden met onsen live ende met onsen gode, so waer ende waer an dat het gheleghen es. Ende wi Willem^w grave van Heynegouwen^x etc., Reynoud des graven sone van Ghelre ende Dieric grave van Cleve vorscreven, om bede ende versoec edelre lude heren Pieters heren van der Lecke ende Henrix^y sijns soens^z vorscreven, verbinden ons ende verwilcoren den here van der Lecke ende Heynric^a' sinen sone hem jof haren erfnamen des haers ghebrake te doen houden alle dese stucken vorscreven sonder enich ghebrech, ende gheloven alle drie ghesameder hand dese stucken te voldone ende te done^b' houden ghelic dat vorscreven es.

In kennesse hier of hebben wi Pieter here van der Lecke ende Henric^c' sijn zone vorscreven, ende wi Willem^d' grave van Heynegouwen^e' etc., Reynoud sone des graven ^f' van Ghelre ende Dieric^g' grave van Cleve dese lettre open beseghelt met onsen seghele. Ghegheven des dinxendaghes na Alreheyligher misse int jaer XXV^o.