Registers van de Hollandse grafelijkheid 1299-1345

Vrouw Jutte, vrouwe van Brandenburg, verklaart dat graaf (Willem III) de achterstallige sommen in verband met de lijftocht die zij had gekregen van wijlen heer Jan van Brandenburg volledig heeft uitgekeerd, alsmede de som voor het lopende jaar; op haar verzoek wordt de oorkonde meebezegeld door haar bloedverwant heer Gijsbrecht heer van IJsselstein.

Allen den ghenen etc.^a make ic Jutte cond, vrouwe van Brandenburch, dat mijn here die grave van Heynnegouwen^b ende van Holland^c mi ghenoch ghedaen hevet toit desen daghe toe van alle den achterstalle van miere lijftochten die mi here Jan van Brandenburch, dair God die siele of hebben moete, makede; voirt heft^d hi mi ghenoch ghedaen van miere lijftocht van desen jare, dair die daghe comen sullen die ene helfte te sente Martijns^e misse in den winter^f naist comende ende die ander helfte te sente Pieters misse inden lenten^g dair na naist comende.

Ende om^h dat ic mi dair of wel ghepayt houde, zo heb ic desen brief open beseghelt mit minen seghel; ende om die mere sekerhede^{i j} kennisse so heb ic ghebeden minen lieven neven heren Ghisebrechte^k here^l van IJsselsteyne^m dat hi desen brief mit mi beseghelen wil. Ende wi Ghisebrechtⁿ here van IJsselsteyne^o om bede wille onser liever nichten veren Jutten voirscreven so heb wi desen brief mit hoir bezeghelt mit onsen seghel toit ere orkonde.

Ghegheven in den Haghe des dinxendaghes voir Alre ^p heylighen daghe int jaer ons Heren M CCC^o ende XXX^o.