Registers van de Hollandse grafelijkheid 1299-1345

Graaf Willem III doet uitspraak in een geschil omtrent sluizen en uitwatering tussen die van Riederambacht en die van Zwijndrecht.

Wi Willaem^b grave van Heynnegouwen^c, van Holland^d, van Zeeland^e ende here^f etc. maken cond etc. dat onse lude van Rieder ambocht op die eene side ende onse lude van Zwijndrecht^g op die ander zide van sulken twiste als si onderlinghe hadden van slusen, van wateringhe, van bedrive ende van anderen zaken op ons ghebleven sijn te houden alsulc segghen als wi dair of segghen souden, wair of wi^h wel beraden uten dair of onse segghen in deser manieren.

In den eersten dat die van Rieden eene sluys legghen sullen in den dam die op den uterdijc leghet an Riederwairt side toit haire oirbaire, ende die van Riede sullen hebben vier voete dijcs an elke side van der sluys die si ⁱ becosten, maken ende houden sullen mit der sluys voirs., ende dese sluys ende sluys vliet buten ende binnen ende die sluys die in ouden dijc leghet sullen die van Riede bedriven mit haren dijcgrave ende heemraet van Riederwairt^j. Ende wair dat sake dats noit ware dat men die sluys voirs. besoeken moeste, soe mochten die van Riede een vingherlin maken binnen ende buten omme dien sluysvliet te droeghene, ende den dijc an beyden ziden op delven alsoe verre alst oirbair wesen sal die sluys te versoeken ende te maken, ende dien dijc sullen die van Riede weder maken alsoe goet ende alsoe zeker als hi te voren was, ende die vingherline weder op rumen binnen ende buten op hoiren cost; ende als die dijc weder ghemaect sal sijn, soe sullen die van Zwijndrecht^k horen dijc weder ane nemen, maken ende bedriven toit IIII voeten toe an beyden ziden van der sluys.

Voirt wair dat sake dat die ^l sluys die die van Riede^m legghen sullen in den dijc van Zwijndrechtⁿ op den uterdijc van Riederwairt uyt vloeghe jof doere van der sluys brake, onghelovet van den haemraet, alse dat die van Zwijndrecht^o scade dair bi namen, dat souden die van Riede hem beteren ende ghelden alsoe groet^p als ons jof den ghonen dien wiere toe setten sullen redenlic dencken sal; ende dat te voldoene dien van Zwijndrecht^q belyen wi ons selven dat wi borghe sien voir die van Riede, die ons dair of belovet hebben scadeloes te houdene.

Wair oic dat zake dat die dijc van Zwijndrecht^r in brake ongheloift van den heemraet van Zwijndrecht^s, alsoe dat die sluys ^t die^u dien van Riede toe behoirt dair bi in brake jof scade ane ghesciede, dien scade souden die van Riede verhalen mit den rechte op die^v van Zwijndrecht^w.

Vort^x wair dat sake dat Riederwairt in brake, soe souden die van Rieden hoire sluys die in den ouden dijc leghet weder toe slaen toiter tijd toe dat si hare land weder ghedijct ende versekert hadden ende dat water ghesceyden, ende danne mochten die van Rieden hoire sluys weder op doen ende dair dore wateren als si te voren plaghen; ende wairt dat si des^y niet en deden noch doen en wouden, soe soude dat doen die dijcgrave van Zwijndrecht^z bi sinen heemraet jof die ghene die wi of onse nacomelinghe dair toe setten ende bevelen souden te doene.

Voirt van uterdiken ende van anderen zaken dair die partyen voirs. meer omme twyeden, houden wi noch an ons selven te verclairsene, dair wi hoir betoech van beyden siden, est bi brieven of andersins, of sien ende verhoiren willen, ende een tijd dair toe te setten onse segghen dair of te verclairsene alst ons tijd dencken sal.

In orkonde etc. Ghegheven in die Haghe des donresdaghes na Paischdach in anno XXXIII^o.