toon een folio

D’at (in eerste instantie was Daer geschreven)

Folio 41v uit Handschrift B

6248		Dat hare heer waer gheuaen
6249		Dat was te muden doe si daer quamen
6250		Mochten si doen ghene vramen
6251		Want dat wolc es sonder houet
6252	V 10	Doch luttel of niet des ghelouet
6253		Si voeren lolende op die zee
6254		Daer vier viue hier drie daer twee
6255		Recht alst volc dat wilde ontsinnen
6256		Doe dit vernamen die van binnen
6257	V 15	Seiden si ten graue doet v lieden
6258		Keeren waert dat ons mesciede
6259		Ghi souter selue om steruen mede
6260		Die graue sende staphans ter stede
6261		Eenen brief ende ontboet
6262	V 20	Sine luden cleen ende groet
6263		Dat si thuus al stille saten
6264		Hi hoepte cortelic der baten
6265		Dat hi met minnen soude comen wt
6266		Dat volc wart doe soe luut
6267	V 25	Dat²³⁴ wel naer al was verdoeft
6268		Gods hat hebbe hi die des gheloeft
6269		Spraken die oude metten ionghen
6270		Sine hebben hier toe bedwonghen
6271		Dus ne suldi niet ontgaen
6272	V 30	Alse die verraders dit verstaen
6273		Waren si niet te bliuen bout
6274		Ende wilden voeren in haer behout
6275		Verre in een ander lant
6276		Die van naerden vreystent te hant
6277	V 35	Ende leyden hem eene laghe
6278		Recht op den vijften daghe
6279		Souden sine voeren hare vaerde
6280		Ende setten doe op eenen paerde
6281		Ende bonden sine voete
6282	V 40	Ondert tpaert harde onsoete
6283		Ende eenen hanscoe inden mont

6284		Dit seide mi diet was cont
6285		Ende diene dus ghebonden vant
6286		Doe voerden sine alte hant
6287	V 45	Tot dat si bi naerden quamen
6288		Doe si versaghen ende vernamen
6289		Die lude liggen in dat coren
6290		Gheraet van velsen die ret voren
6291		Ende vraghede hem wat si sochten
6292	V 50	Dandre seiden si brochten
6293		Dat wouden si hebben dat waer die graue
6294		Dien wouden si laten om ghene haue
6295		Dan sal niet wesen sprac gheraet
6296		Ende werp omme metter vaert
6297	V 55	Ende trecte tzwaert ende woude slaen
6298		Den graue die hem pijnde tontgaen
6299		Hi waende dat tpaerdekijn springen soude
6300		Ouer den vliet ende also houde
6301		Viel dat paert al metten graue
6302	V 60	Jnden sloet gheraet sat aue
6303		Ghetoghens zwaerts ende ghincken slaen
6304		Die graue ne conste niet ontgaen
6305		Want hi ant peert was ghebonden
6306		Daer stac hine ten seluen stonden
6307	V 65	Metten zwaerde dor den liue
6308		Ende gaf hem wonden meer dan viue
6309		Oec stac hine in herte al daer
6310		Dat men vant al openbaer
6311		Si gauen hem ten seluen stonden
6312	V 70	So diep ende so menighe wonden
6313		Dat hi daer den gheest op gaf
6314		Eer die van naerden yet wisten af
6315		Doe sijt vernamen liepen si toe
6316		Ende gheraet van velsen was doe
6317	V 75	Sijn paert so verre van hem gegaen
6318		Dat hijs niet ne mochte vaen
6319		Een sijn knape gaf hem sijn paert